Rumah Adat Karo


Rumah adat kalak Karo i gelari rumah si waluh jabu. Erti kata jabu e me sada anak dilaki si enggo erjabu. E maka adi ngerana kita kerja jabu biasanan ngerana kerna dilaki, sabap dilaku (perbulangen) jadi kepala ibas jabu. Rumah adat enda pintuna dua e me pintun arah kenjahe ras pintun arah kenjulu. Tiap jabu lit pintun perikna. Jabu si arah ture kenjahe ras jabu si arah ture kenjulu dua pintun perikna. Perjabu tengah empatna tiap jabu sada ngenca pintun perikna. Tarum rumah adat ijuk. I datas tarum arah ture kenjahe ras arah ture kenjulu i pasang tanduk kerbo. Kaki lima rumah adat igelari ture, lit redanna, bagepe ibas rumah lit ka redan ku das para muat ranting. Sabap ranting i datas para.

Rumah adat lit si empat jabu, si waluh jabu, sepulu dua jabu janah lit ka si sepulu enem jabu. Tapi buen rumah adat si waluh jabu. E maka rumah adat Karo igelari rumah si waluh jabu. Teptep jabu lit gelar ras tanggung jabap si ngianisa.
Gelar-gelar jabu bage pe si ngianisa:
1. Jabu bena kayu tah pe igelari ka "jabu raja", si ngianisa anak taneh (simantek kuta).
2. Jabu ujung kayu singianisa anak beru perjabu bena kayu.
3. Jabu lepar bena kayu (jabu sungkun berita) si ngianisa senina si lako runggu jabu bena kayu.
4. Jabu lepar ujung kayu si ngianisa kalimbubu bena kayu.
5. Jabu sendapuren bena kayu si ngianisa anak beru jabu ujung kayu entah pe anak beru menteri perjabu bena.
6. Jabu sidapuren ujung kayu si ngianisa anak/senina jabu lepar ujung kayu tah pe anak/sembuyak kalimbubu bena kayu.
7. Jabu sidapuren lepar ujung kayu si ngianisa guru.
8. Jabu sidapuren lepar bena kayu singianisa anak/sembuyak si ngiani jabu ujung kayu.
Tanggung jabap keamanan jabu e pe i rasken. Si ngiani rumah suari pegancih-gancih. Teptep jabu dat bagin ngaianisa, gelarna "kerin".
I tengah rumah si waluh jabu e lit dalan ku pintun kenjahe entah pe ku kenjulu arah e me kita erdalan adi ndarat gelarna "labah". Teptep jabu lit dapurna. Babo dapur e para tuhur ingan njemur page. Babo para tuhur e para kudin, babo para kudin para ranting ingan ranting, ingan petasak galuh, ingan muniken benih.

Gelar ras Guna Bagin-bagin Rumah Adat karo ras Susunen Pintuna
Bagin-bagin rumah adat Karo kerina lit gelarna ras gunana.
1. Palas gunana natang binangun e panjek.
2. Binangun gunana natang tekang.
3. Pandak gunana natang papan jabu.
4. Kite-kite kucing gunana natang tunjuk langit.
5. Tunjuk langit gunanan natang tarum.
6. Nderpih gunana natang dingding rumah.
7. Melmelen gunana natang nderpih.
8. Sendi e me papan mekapal itamaken kubas lubang binangun ras pandak si enggo i pahat.
9. Danggulen e me tangga i ture nari ku rumah.
10. Ayo-ayo e me buluh ibayu ibahan telu sukina i pasang i teruh tanduk maka mejile rumah.
11. Tanduk i pasang i das ayo-ayo rumah gelah metunggung rumah man tatapen.
12. Redan ture e me redan i teruh nari ku ture.
13. Ture e me kaki lima rumah, ingan singuda-nguda mbayu, ingan anak perana ras singuda-nguda ngerana-ngerana nuriken ate ngena, ingan anak-anak ridi, ingan kuran, ingan lantaren.
14. Bendi-bendi e me cikepen tan adi kita ku rumah i ture nari. Bendi-bendi e inganna arah kawes ras kemuhen pintun/labah mbelang.
15. Dapur gunanan ingan erdakan, dapur rumah si waluh jabu lit empat. I dapur em ibahan daliken.
16. Daliken ibas batu jenis arunggisgis nari, gunana ingan kudin sangana erdakan. Daliken buena lima i bas sada dapur, susunen daliken bagi mata lima sada itengah si galangna, sada dapur i gunakan dua jabu.
17. Para tuhur gunana ingan njemur page, inganna i das dapur.
18. Para tengah gunana ingan nangketken ukat, inganna i babo para tuhur.
19. Para kudin gunana ingan kudin, inganna i babo para tengah.
20. Para ranting gunana ingan ranting, ingan petasak galuh, ingan ngkerahken jaung sinuan benih page ras si debanna.
21. Para negeng gunana ingan muniken kepuk, baka inganna i babo ingan medem.
22. Redan para gunana dalin nangkih ku das ranting.
23. Labah mbelang gunana dalin ku rumah i ture nari. Labah/pintu mbelang lit dua, arah kenjulu ras arah kenjahe.
24. Pintun perik si waluh jabu lit sepulu dua, empat jabu si arah ture, teptep jabu dua pintun perikna, empat jabu nari (perjabu tengah) sada ngenca pintun perik e gelah ku rumah, ngintip musuh.
25. Jabu gunana ingan tading keluarga, ingan man, ingan medem, ingan arih-arih ras sidebanna. Jabu ibas rumah adat lit waluh.

Tanda-tanda Silit Ibas Bangunen Rumah Adat Karo
Tanda-tanda si lit ibas bangunen rumah adat Karo bandi sinehen ibas dinding, melmelem, ayo-ayo ras pintun rumah adat.
Ibas dinding rumah ibahan pengeret-ret guna penjaga rumah, gelah begu la pang ndeher, gelah dame singiani rumah, ersada arihna.
Ibas pintun rumah, ibahan bendi-bendi kawes kemuhen. Bendi-bendi enda sebagai pengalo-ngalo. Ise si kurumah adat la banci lang njemak bendi-bendi e.
Ibas ayo-ayo rumah adat lit erbage-bage ibahan simbol-simbol tah pe tanda-tanda umpamana:
- Mata-mata lembu ibahan ibas bayu-bayu ayo-ayo rumah, guna pelawes mara.
- Bunga gundur, enda pe iukir/ibayu ibas ayo-ayo rumah adat, e pe gunana pelawes/pesilah mara.
- Lumut-lumut lawit, tempune-tempune, bak-bak tenggiang, pancung-pancung cekala. Tanda-tanda enda kerina e bayu ayo-ayo rumah adat. Gunana gelah rumah e mejile man tatapen.
Ibas melmelem (dapur) rumah adat pe lit erbage-bage ibahan tanda-tanda e me:
- Tapak Raja Sulaiman iukir ibas melmelen gunana gelah begu la pang ndeher, gelah mejuah-juah si ngiani rumah,. Simbol Tapak Raja Sulaiman enda pe ibahan ka ibas ukat, gunana penangkal racun tah pe cerlup. Pe cerlup gelah mejile tatapen rumah e.
- Tutup dadu, timba lau, iukir arah das ras teruh melmelen rumah adat. Gunana gelah mejile tatapen rumah e.
- Melala denga erbage simbol-simbol si lit ibas rumah adat, umpamana: desa si waluh, embun si kawiten, tulak paku ras si debanna.
Sumber: Sinalsal - Dra. Kartini Bangun, M.Hum. via KaroKabGoid

0 Response to "Rumah Adat Karo"

Posting Komentar